Col 1 | ATA | STEP | Eni Paulo, eni aposeli noxou Kalisito Iesu. No anu masaxa noxou Lataua la eni exali aposeli. Nexi noxou vivinge Timoti tekaukavunu vaikala ane 'o ulai noxinge ngingi ta mitema noxou Lataua e ngemulimulinu no tuala ne Kolosi, ngingi ta vivixe ta mulu xe ta sema ane ngexolu va'axu no anu 'ilixo masumasua xe ngemuxaxu tangingi pekia'u noxou Kalisito. Nexi takilaka lexe alauna mo opo se'isisi noxou Lataua uxolu noxinge.

a 1:3-4Ep 1:15-16

b 1:5-6Ep 1:13; 1Pi 1:4

c 1:7-8Kol 4:12; Plm 23

d 1:9Ep 1:16-17

e 1:11Ep 1:19; 3:16

f 1:12Ep 1:11, 18

g 1:13Luk 22:53; Ep 2:2

h 1:14Ep 1:7

i 1:15Ioa 1:18; 2Ko 4:4

j 1:17Ioa 1:1; 8:58

k 1:18Apo 26:23; Ep 1:22-23; Pal 1:5

l 1:19Kol 2:9

m 1:20Ep 1:10

n 1:21Rom 5:10; Ep 2:12

o 1:22Rom 5:10; Ep 5:27

p 1:25Ep 3:2, 7-8

q 1:26Rom 16:25-26; Ep 3:5, 9

r 1:29Ep 3:7, 20; Pil 4:13

Colossians 1

1 Eni Paulo, eni aposeli noxou Kalisito Iesu. No anu masaxa noxou Lataua la eni exali aposeli. Nexi noxou vivinge Timoti tekaukavunu vaikala ane 'o ulai noxinge ngingi ta mitema noxou Lataua e ngemulimulinu no tuala ne Kolosi, ngingi ta vivixe ta mulu xe ta sema ane ngexolu va'axu no anu 'ilixo masumasua xe ngemuxaxu tangingi pekia'u noxou Kalisito. Nexi takilaka lexe alauna mo opo se'isisi noxou Lataua uxolu noxinge.

Vaikala Laixe Ilou Lakilaka Noxi'a Paulo Ilou Timoti

3 ^aNo anu lakilaka noxixe noxou utotomu ne nexi taxavutalangengi sou takilakasinge, la tavikala laixe musuku ulai noxou Lataua anu Tilasinge Iesu Kalisito Momu. 4 Xo nexi telomusou lexe ngingi ngemuxamuxaxu tangengi noxou Kalisito Iesu mo tangengixa'a ta mitema noxou Lataua mukalusi. 5 ^bNgingi ngemulimulinu 'ili'ilixo ane ne, xo ngingi ngemolo tangengi lexe ngexomaiou mii ma'ia ane Lataua mumuxaxu muai teitexi no opo loxotolo sou ulosinge ili'i. Mo ngingi ngelavusou mii ane ne no mine ngingi ngelomusou vaikala manina no anu a'alo laixe noxou Iesu e mune'e muxali noxinge. 6 A'alo laixe noxou Iesu ne, ta mitema noxou Lataua mia'aloxu mulai noxi'a ta mitema no xalexalee tuatuala mukalusi no lia 'o, la ta mitema tavu'alo mimulaxu tane'i no anu mo usukusuku ulai noxi'a ta mitema tavu'alo la. Anu aloxo musoko sou muxaxai noxinge no taiingengi no voxo ane ngingi ngelomusou xe ngelavusou alauna noxou Lataua no anu vaikala manina sou a'alo laixe noxou Iesu. 7 ^cA'alo laixe ane ne, Epapalasi mua'alomengixu mo ngelomusou. Epapalasi ne, anu itema vile laixe sou xaixai noxou Kalisito ane. Anu menexixe mo nexi tamasaxau misevile, mo anu u'oxonu xaixai laixe sou usu'ulinexi no anu xaixai e nexi tamomomo sou ta'oxonu uasi. 8 Mo anu kalumo anu muvikalanexi no anu 'ilixo sou ngamasaxai'a ta mitema noxou Lataua mamina xo Uleenu Tavuna muxolu noxinge.

9 ^dTava'u aloxo ne, la sou musoko no mine nexi telomusou a'alo sou 'ili'ilixo laixe noxinge ne, la nexi tama'ila sou takilakasinge uasi. Mo utotomu no anu lakilaka noxixe, la nexi takilaka ulai noxou Lataua lexe Uleenu usu'ulingengi mo ulosinge no anu lavulavu no anu mii ma'ia ane anu umasaxainge sou ngingi nga'oxonu. 10 Mo nexi takilaka lexe xoluxolungenge uxali laixe loxo Tila mumasaxau. Mo utotomu ne Anu u'osasinge no anu mii ma'ia ane ngingi nga'oxonu mo xaixai tavu'alo ne nga'oxo laixe ukalusi xe ngingi lavulavumengi sou Lataua ne usuku ulai aloxo ne. 11 ^eMo nexi noxou takilaka lexe, no anu xavi tatila noxou Lataua, la Anu u'oxongengi xavingengi manina mo sou ngingi ngamomomo sou ngatulu pekia'inge sou ngatavulenu tu'utu'umaxu mo ngaxolu se'isisi ulai uxali no mine tu'utu'umaxu ukalu. 12 ^fXe nga'osasou mo ngalemolu laixe musuku ulai noxou Maminge ane Anu mulavusinge lexe ngingi ngamomomo sou ngano'u mimii lailaixe e Anu mulalaxiinu muai sou ulosi'a ta mitema noxou. Ta mitema noxou ne mixolu no anu lamanaxu. 13 ^gXo nenge texolu no nano no isivoxo, la isivoxo muvausinge, ia Anu mulaanenge no anu xavi no anu isivoxo ne, la mumulanenge no anu saxisaxila'u noxou 'Olu e Anu mumasaxau misevile. 14 ^hNoxou 'Olu nesi, la Lataua mulotonenge telivu xe mululusou susu noxinge.

Kalisito Anu Tila no Anu Mimii Mukalusi

15 ⁱIa Lataua 'Olu ne, Anu aloxo Lataua e nenge ta mitema tamomomo sou tamaisou uasi. Mo Anu mupaa tei no anu mimii latala mukalusi e Lataua mukoinu. 16 Xo noxou 'Olu nesi la sou Lataua mukoinu mimii latala muxolu teitexi no opo loxotolo xe no lia 'o. Mo Anu mukoinu mimii ane nenge tamaisou xe ane nenge tamomomo sou tamaisou uasi mo tatananu tuala mo ta uleenu ane ane'i xavine'i mu'oki, xe ta mitema mitulu kisi'a ta mitema xe ane'i ta tatila ane mino'u xavi sou isaxila'a ta mitema. Ta mitema latala ne anu Lataua 'Olusi mukoine'i, la sou ane'i ixolu loxo anu miumiu muisalili. 17 ^jAnu muxolu tei no anu mimii latala mukalusi la sou Lataua mupitane'i noxou sou Anu usaxila'a. 18 ^kMo Anu kisou lalotu xe lalotu ne anu vasimolu. Anusi anu tava'u mauli mo Anusi musoli ka mutulu tei noxi'a ane'i ane misoisoli, la sou Anusi tila no anu mimii latala mukalusi. 19 ^lXo Lataua mumasaxa lexe maulixu lololi ne uxolu noxou 'Olu. 20 ^mMo Lataua umasaxa lexe noxou 'Olusi la ta mimii latala teitexi xe no lia 'o ne ilo'a ipita ixali vilesisi. Aloxo ne la sou sialuxu 'Olu munixisinge no ovu valautu sou mulosinge opo se'isisi.

21 ⁿXo ngingi tei la nge'oxo'oxonu 'ili'ilixo masumasua la ngexolu va'axu la ngexavutala lexe uluamengi ane Lataua. 22 ^oIa vaimomo 'o, no anu solixu Kalisito teitexi no ovu valautu, la sou mupitangengi ngongi'a ngexali vilesisi. Anu mu'oxonu aloxo ne sou ngingi ngaxali malemalenga no mine ngalai ngatulu no iou. Mo susu vile uxolu noxinge uasi xe ngatulu no anu vaivaikala uasi. 23 Ia ngingi ngemuxamuxaxu tangengi pekia'u manina. Loxo 'o io mii vile une'e ulapungengi la uxexengengi no anu a'alo laixe noxou Iesu e ngingi ngelomusou la ngemuxaxu tangengi pekia'u no anu ne, mo xavutalamengi usasalo no anu mii ma'ia ngeloopalanu mamu. La sou eni Paulo exali itema sou a'aloxu a'alo laixe ne, la sou nexi tea'aloxu a'alo laixe ne mulai noxi'a ta mitema mukalusi no lia 'o.

Paulo Muxaxaisi'a ta Mitema Noxou Lataua

24 La sou vaimomo 'o, eni a'osa sou atavulenu tu'utu'umaxu sou asu'ulingengi. Mo eni emasaxa lexe asu'uline'i ta mitema noxou Lataua. Xo ta tema lalotu ne anu Kalisito vasimolu ane ane'i. Xo navunavu ane Kalisito mutavulenu sou usu'uline'i ta mitema noxou Lataua ne, anu ukalu uao. La sou eni emasaxa lexe navunavu noxou Kalisito ne, eni melo atavulenu mo akalusou. 25 ^pLataua molu musosovosilo la sou eni exali itema sou axaixaisi'a ta mitema noxou Lataua mo asu'uline'i. Mo mu'italonu xaixai noxilo xe mupalusilo sou alosinge vaikala noxou Lataua ukalusi, ia pa'usou uxolu uasi. 26 ^qVaikala noxou ne, mutalume noxi'a ta mitema mukalusi ane mixolu tatei mo mune'e muxali vaimomo 'o. Ia vaimomo 'o ne anu mupala'a lamana noxi'a ta mitema noxou. 27 Lataua mu'oxonu aloxo ne, xo Anu mumasaxa lexe ane'i ane ta Iutaia uasi kalumo ilavusou mii ma'ia lailaixe mu'ana'ana noxou e mutalume ne uxali lamana. Mii ma'ia e mutalume ne, ane lexe Kalisito anu muxolu noxinge, mo ngaloopala noxousi sou ulosinge mii ma'ia lailaixe noxou.

28 Nexi taa'aloxu Kalisito ulai noxi'a ta mitema, la tapela'axu laixe mo talosie'i ta mitema vilevilesi no anu lavulavu laixe ukalusi. Mo sou lexe ane'i ilo'a Kalisito ilai itulu no iou Lataua, la anu Lataua umomomo sou umaisou susu vile noxi'a uasi. 29 ^rAloxo ne, la sou no anu xavi noxou Kalisito e Anu mulosilo ne eni axaxai xavileli misevile xe atoxavisilo sou mii nesi.